Oljudálking á sjónum er ein afturvendandi trupulleiki. Orsøkin er ofta, at olja rennur yvir tá bunkrað verður.
Í mun til ábyrgdarøkini hjá Heilsufrøðiligu starvsstovuni er talan um at trupulleikar kunnu verða við øllum livandi í havinum sum seinni verður matur, t.d. fiskur og hummarar, men sanniliga eisini í mun til alivinnuna og raksturin av alibrúkum.



Ábyrgd
Tað eigur ikki at koma fyri, at olja rennur á sjógv. Orsøkirnar til flestu óhappini eru uttan iva vánaligar mannagongdir og ósketni. Tey, sum fáast við bunkring ella annað virksemi við olju, hava ábyrgd av, at einki rennur á sjógv.

Fráboðan
Øll, sum varnast oljudálking, skulu beinanvegin boða frá:
Oljudálking á sjónum skal fráboðast MRCC-Tórshavn, tlf. 351300, teldupost: mrcc@mrcc.fo.

MRCC-Tórshavn boðar síðani øðrum myndugleikum frá, eitt nú sløkkiliðinum, løgregluni, Heilsufrøðiligu starvsstovuni, Umhvørvisstovuni o.ø. myndugleikum.

Viðv. upplatingartíðir á Heilsufrøðiligu starvsstovuni, herundir eisini tilkallivakt eftir arbeiðstíð, sí niðast á hesi síðuni.

Upprudding av olju á sjónum og aliøkir
Kemur oljudálking nærhendis alibrúki, skulu vit gera vart við at øll ferðsla av útgerð í.s.v. oljuálking inn- og út av aliøkjum, skal verða í fullum samsvari við kunngerð um flutning av akvakulturdýrum v.m. (kunngerð nr. 98 frá 2003). Hetta merkir at flutningsloyvi krevst frá embætisdjóralækna, áðrenn oljuverndarútgerð verður flutt inn á aliøkið og somuleiðis krevst flutningsloyvi frá embætisdjóralækna, áðrenn oljuverndarútgerð ella burturkast í hesum sambandi, verður tikið av aliøkinum aftur.